Sabado, Marso 1, 2014

Hashtag Friendzone

Noong niligawan ka niya, nasaktan ako lalo na noong humingi ka sa akin ng payo. Sa halip na umiwas, inalalayan kita at pinili kong nandoon ako.

Noong naging kayo, gumuho ang mundo ko. Hindi ko maintindihan pero sino nga ba ako para masaktan gayong hindi ko naman ipinaalam ang tunay kong nararamdaman. Nakita kitang masaya kaya sa bawat hakbang mo kahit nasasaktan ako, nandoon ako.

Noong naghiwalay kayo, patawarin mo ako pero natuwa ako sa pag-asang muling magbukas ang puso mo. Sa bawat iyak mo, sa tuwing kailangan mo ng panyo na papawi sa mga luha mo, nandoon ako.

Nakalimot ka, bumangon at muling nagsimula. Nakakita ako ng pagkakataon kung saan sa puso mo pwedeng ako naman ang nandoon. Ngunit hindi pala ganoon kadali. Sa tuwing kasama kita alam kong siya pa rin ang nasa isip mo. Sa tuwing magkausap tayo dama kong siya pa rin ang nasa dulo ng dila mo. Sa tuwing napapatawa kita sigurado akong ang alaala niya pa rin ang nagpapahalakhak sa'yo.


Ok lang. Sinubukan ko lang naman. 

Sa susunod na magmahal ka o kung muli mo siyang makasama, pangako nandoon pa rin ako. Hindi para muling umasa kundi bilang isang matalik na kaibigan na aalalay kapag natisod ka, sasalo kapag nahulog ka, at magbabangon sa'yo kapag muli kang nadapa. 

Walang komento: